GeneralHits: 364
Desaroyonan na Venezuela ta confirma veracidad informe DIARIO
- Tur cos por pasa na e gigante petrolero Venezuela na man di Maduro
- Pueblo Venezolano desespera no por entrega e lucha pa democracia
ORANJESTAD (AAN) Na un forma constante y cu pruebanan palpabel, e matutino di Aruba cu asistencia di expertonan, durante ultimo añanan, a prepara Aruba pa e bom cu lo a rementa ora Venezuela mester acudi na urna electoral na 2024.
DIARIO a kibra frontera di periodismo local y a mustra riba e bienestar di Aruba mara na e sucesonan na nivel internacional decisivo pa e pais Aruba y pa su ciudadanonan.
Eleccionnan cu lo a trece cambio politico grandi na Hulanda y pa Reino; e situacionnan tenso na Merca y e eleccionnan na Venezuela, tabata casi diariamente centro di noticianan di DIARIO, cu a hasta pronostica e forma cu e eleccionnan na Venezuela, ta mishi cu henter e region di cual Aruba ta forma parti.
Kico ta pasa den porta di Aruba, e pais cu segun Nicolas Maduro ta situa den awanan teritorial di Venezuela, cu asina ta exigi pa Aruba keda bou alarma grandi sigur despues di loke a pasa na Guyana.
Seguridad Nacional na Aruba na e momentonan aki ta e elemento clave, mientras tur dirigente mundial cu a cera wowo pa e berdad di Nicolas Maduro, ta duna prueba cu nan tin miedo di e resultado cu e actual situacion na Venezuela por tin.
DIARIO, a base di informacion concreto cu e ta compila, a splica Aruba con Nicolas Maduro lo a hunga cu e posibilidadnan cu eleccion democratico ta brinda pa e keda na mando.
Informantenan clave di DIARIO riba tereno internacional, ta papia di e forma cu Nicolas Maduro a mishi cu democracia, pero teniendo porta habri pa awe e trata na reclama cu el a respeta e proceso democratico.
Intimidacion di oposicion, detencion y abuso di personanan cu por a forma peliger pa su gobernacion, militarisacion ta forma parti di e forma cu Nicolas Maduro a forma su baluarte socialista/comunista den region di Caribe, caminda awor e mester realiza e fase final di su dictadura.
Informantenan ta papia di e ehercito y e material di guera cu Nicolas Maduro hunto cu e expansionistanan comunista tin prepara na Venezuela, caminda infiltracion den Pueblo a deshaci di e seguridad personal cu democracia ta brinda na Pueblo.
Manera a bini dilanti, na e momentonan aki un Pueblo Venezolano desespera ta lucha pa e unico luz cu ainda ta briya na horizonte cu asistencia di mundo liber, cu ta e entrada di democracia pa un Pueblo cu ta doño di reservanan di petroleo mas grandi na mundo mescos cu uno di e paisnan cu mas rikeza natural riba tereno internacional.
Si e Venezolano na e momentonan aki no hiba un lucha tenaz contra Nicolas Maduro, futuro liber y dignidad humano ta muri na man di Nicolas Maduro y den porta di Aruba lo nace un dictadura cruel sin limite, cu lo trapa no solamente riba e derechonan di e ciudadanonan Venezolano pero lo pone seguridad di tur pais den e region aki na peligro.
E reaccionnan local na Venezuela pero tambe na nivel internacional riba e eleccionnan na Venezuela ta directamente basa riba e resultado cu un gobernacion di Nicolas Maduro lo tin pa e region di Caribe, America Latina na prome lugar pero tambe na nivel mundial sigur den cuadro di e problemanan serio cu mundo mester confronta.
Nicolas Maduro ta representa e poder Comunista, e poder di petroleo y otro rikezanan natural cu no ta wordo uza pa e Pueblo di Venezuela cu a bira pober mientras e grupo di Nicolas Maduro a bira rico pa medio di e forma cu nan ta trapa riba derechonan democratico y ta forma un peligro pa bienestar di e ser humano.
Den futuro directo tin tres posibilidad pa Venezuela.
Manera expertonan ta bisa tin e posibilidad di paz cu ta mas leu cu nunca a base di e hecho cu e ideanan di Nicolas Maduro no ta permiti paz pero opresion di hende cu conduci na guera.
E dos posibilidadnan mas grandi ta cu Nicolas Maduro ta realiza e ultimo fase pa implementa dictadura oficial na Venezuela den cooperacion cu su aliadonan extremista.
E ultimo opcion ta e temor grandi di Nicolas, cu ta mas peligroso cu nunca, pasobra e Pueblo desespera di Venezuela por dicidi pa un guera civil den cual nan lo contesta e crueldadnan di Nicolas Maduro y su gobernacion.
DIARIO, cu a prepara Aruba pa e momentonan aki, lo sigui informa Aruba cu luho di detayes!
